Academia Occitana

Perdut, fenit, 'chavat

A ! las ampas la maiossas
le bon vin qu'avèm begut
a ! las filhas genta' e rossas
tot quò qu'es perdut perdut.

Ai la cervèla plena
chançons conte' a ravir
mas tot le monde rena
quand zò dono a auvir.
Qui n'en vòu de mon conte
qui vòu de ma chançon ?
Dengús que siese prompte
a me faire resson.

A ! las claras las chalaias
le grand èr qu'avèm sentit
a ! las tuaas las escossalhas
tot quò qu'es fenit fenit.

Un còp de bòta esbòlha
las formiàs e lhòr nis.
Gaitatz-me la despòlha
qu'es venut mon país.
Còp de bòta o auratge
le reconeisso plus.
A perdut son lengatge.
Es país de dengús.

A ! las feiras las borrèias
le bon temps qu'avèm galat
tot quò qu'es d'istòrias vièlhas
tot quò qu'es ben achavat.

Una borra s'esfata
mon chamin se desfai.
Solet tiro la pata
coma un riu que se'n vai.
Dengús que me comprenga
rian de mos esclòps
e rian de ma lenga :
siau l'òme d'autres còps.

Botat en musica e chantat pèr Marc Noalha (Marc Nouaille : La Color de ton còr, 2007, noalha@tele2.fr)

Jean-Claude Forêt : Un grand eissam de mots, éditions EMCC, 18, rue Childebert, 69002 Lyon (2013).

(amb l'amabla autorizacion de l'autor)