Academia Occitana

Libertat de pression

Academia Occitana

Jorn per jorn

Libertat de pression

Lo Jornalet, organ d’informacion sus la tela, ven de refusar un article mieu jol pretèxte qu’es « una provocacion de las bèlas » e que cap « tornarmai d'atacs al Congrès Permanent ». E lo delicte es precisat : « La question de l' "-e" de sosten es la mai polemica qu'existís dins los debats de lingüistica occitana ». M’èri contentat, per una partida de l’article solament, de mostrar que dins dos cases, los lexicografes favorables al famós « -e » de sosten èran fòrça majoritaris, quitament al Congrès permanent, e qu’aquestas fòrmas èran generalizadas dins la lenga parlada. Aquò me daissa un pauc estabosit. E mai encara quand me dison qu’aqueles subjèctes « de lingüistica » non an lor plaça dins un jornal d’ « actualitat », alavetz qu’i trobam de contunh d’articles sus la lenga - los mai legits -, emai d’unes dispensats generosament per un « lingüista professional », lausenjat a cada paraula pel còr de las vèrges. Tè ! Non, non es possible ! Quina pensada marrida ! Seriá indigne d’un òme de sciéncia coma d’un jornalista liure... Non m’anatz dire que Lo Jornalet que passa per un lòc de debat e de libertat, fòra de tot sectarisme, se met al nivèl de La Setmana, aquela que beu sa vergonha a gorjadas despuèi la creacion de l’Acadèmia occitana ! Non, non i pòdi creire ! Mas benlèu… S’es per non desplaire a l’anonciaire principal, aquí compreni melhor. Sabi que cal viure, e que non es aisit de téner un jornal a plec de braç. E sabi perdonar.

Mas i pensi. I a ben una rubrica dins Lo Jornalet que s’apèla « opinion », ont los articles son jos la sola responsabilitat de lor autor ? E provocar de debats es totjorn benefic per un jornal. Fa avançar las idèas, permet de trobar de lectors novèls…

Pro amb aquò ! L’idèa la vos faretz en legir lo papièr en question sus aqueste site : http://www.academiaoccitana.eu/?q=oc/node/157 (après aver brutlat d’encens, segur, al sols noms diabolics d’Honnorat, de Mistral e d’Alibèrt). Serà tanben publicat dins la revista Gai Saber. Aquesta qu’es eissinja de subvencions (que tocava despuèi de decennis) per l’elegit occitanista del Conselh Regional : d’unes i veson un rapòrt. De questions, totjorn de questions…

J. P.