Academia Occitana

Lo còr manjat

Academia Occitana

Jorn per jorn

Lo còr manjat

«  E quant ela revenc, si dis : « Seingner [sénher], ben m’avetz dat si bon manjar que ja mais non manjarai d’autre » (…) e s’en anet al balcon e se laisset cazer jos, e fo morta ». Plan coneissèm la « vida » del trobador Guilhèm de Cabestanh, amorós de Seremonda, assassinat pel marit, En Raimond de Castèl Rossilhon, aquel « hom iratz e gelos » que puèi li desrabèt lo còr per lo donar a manjar a la dòmna. Lo tèxte es conegut en quatre versions principalas, mas la mai corta nos ditz remirablament lo drama en qualques linhas essencialas. D’aquò lo compositor anglés George Benjamin ven de ne far un opèra, Written on skin, creat lo 7 de julhet 2012 al Festenal d’Ais de Provença e que foguèt presentat del 23 al 30 de novembre al Capitòli de Tolosa. La referéncia al mite occitan i èra clarament afirmada malgrat una transposicion necessària. E l’acuèlh foguèt triomfal. Quand nòstra cultura rencontra las dauraduras mai prestigiosas del país, lo talent artistic e un public de tria.

Non mancava que la premsa occitanista.

J. P.