Jorn per jorn

Lo match

Aquò es partit. D’un costat l’occitan gascon oèst-pirenenc - d’unes qu’an lo gost de l’emfasi dison lo bearnés -, de l’autre l’occitan lengadocian oriental - d’unes qu’an lo cap epic dison lo cevenòl. Es una batèsta pel títol prestigiós d’occitan imperial. Longtemps dins la corsa, l’occitan provençal, embolhat dins sos afars intèrnes amb los pseudoprovençalistas, es relegat ara en segonda division. Non fa gaire, l’occitan lengadocian oriental aviá l’avantatge mas ara es l’occitan gascon oèst-pirenenc qu’es en progression fulguranta. A l’epòca l’occitan lengadocian oriental senhorejava pertot. Ara, a l’Institut d’Estudis Occitans, sus la tela coma endacòm mai, es l’occitan gascon oèst-pirenenc. Non fa gaire, los panèls sul camin de Sant-Jacme foguèron escrits en occitan lengadocian oriental. La replica a aquela injúria non se faguèt esperar longtemps : l’occitan de l’Euroregion Aquitània es desenant, e sense discussion, l’occitan gascon oèst-pirenenc. Fòra jòc en Aquitània son los parçans sinistrats de lengatge inferior, Gasconha centrala amb son sembla gascon oèst-pirenenc, Agenés amb son sembla lengadocian oriental e Peiregòrd amb son sembla lemosin. Benlèu l’occitan lengadocian oriental aurà el tanben son prat cairat en Lengadòc-Rosselhon, se se sap far amb los politicians locals, e aital sas escasenças tornaràn pujar. A l’ora d’ara, lo combat se debana al Congrès : se lo president de la Comission lingüistica es cevenòl, es lo gascon oèst-pirenenc qu’es la lenga oficiala de l’institucion. Qui ganharà la copa (santa) ?

- Excusatz…. lo telefòn ! Digatz… òc… Ara va ! E ben ! Plan mercés… Es qualqu’un que me ditz que per metre los candidats d’acòrdi, sufiriá de mesclar tot aquò e lo demai, plan bolegar amb un movement pluricentric, puèi daissar pausar al fresc per evitar l’evaporacion.

J. P.